ماهو شمع الاذن وهل يسبب صداع ؟ الوانه وعلاجه للكبار والاطفال

كتير بيكون عندك فضول تعرفي اكتر عن شمع الأذن فوايده واضراره ؟ امتي تعرفي ان في مشكلة وامتي لا؟! وفرنالك معلومات كفايه انك تعرفي تتعاملي مع شمع الأذن ومن غير اي ضرر صحي عليها ...

ما هو شمع الاذن

شمع الاذن او مايدعي ( صملاغ - أف الأذن ) .. مادة شمعيه بتتكون نتيجة خليط من إفرازات الغدد الدهنية والعرقية و خلايا الجلد الناتجه مع بعض وهي ماده لزجة. الشمع في الاذن اما انه يكون جاف (صلب ) او يكون رطب وده بيرجع لعوامل وراثيه وجغرافية زي في شمال شرق آسيا وخصوصاً الصين وكوريا بيكون جفاف شمع الأذن منتشر في سكان بلادهم .


المنتشر بينا ان لون شمع الأذن اصفر لكن اللي ممكن تكوني تعرفيه لاول مرة ان الوانه بتختلف وكل لون بيكون دليل لسبب تعالي شوفي نقصد إيه ..

الوان شمع الاذن

شمع الاذن الاصفر والبني

• وده بيدل ان شمع الأذن رطب بطبيعته .
  

شمع الاذن الابيض والرمادي

• ده بيدل ان شمع االأذن جاف بطبيعته .

شمع الاذن الاصفر اللين

• ده معناه ان شمع الأذن جديد .

شمع الاذن الغامق والصلب

• بيكون معناه ان الشمع قديم او بقاله فتره من غير تجديد .

شمع الاذن الشاحب وبه قشور

• ده معناه ان الشمع قديم جدا وهنا لازم يخرج من الأذن والا هيسبب في انسداد للأذن .

شمع الاذن مع دم

• ده معناه ان في جرح في قناة الأذن وطبعا لازم هنا تتابعي مع دكتور .

شمع الاذن السائل

• معناه إلتهاب في الأذن وطبعا هنا بردوا لازم تتابعي مع دكتور .

شمع الاذن الاسود

•  تراكم الشمع فتره طويلة وان في جسم غريب في الأذن .

سبحانه لا يخلق شيئا عبثا .. ممكن نقول ان شمع الاذن زي الرموش للعين بظبط زي ما الرموش بتحمي العين شمع الاذن بيحمي الاذن وده ازاي ؟!

فوائد شمع الاذن

• يحافظ علي الاذن من الجفاف ، عشان كده لما بيكون في نسبه شمع قليله عن الطبيعي بتحس بجفاف وحكه .
• نقدر نقول الشمع عباره عن تنضيف ذاتي للاذن تخيلي وانتي بتاكلي او بتتكلمي والفك بيتحرك ده بيسبب في ان الاذن بتتخلص من الشمع المتراكم القديم وبتفرز جديد،  وبكده بتحصل عملية التنضيف .
• ده غير ان الشمع بيحمي الاذن من الفطريات والبكتريا والحشرات والماء .

  ده بالنسبة لفوايده نتكلم عن الاضرار الشمع سواء احنا كنا سبب فيها او بسبب افراز زياده او جفاف او مرض , متحاوليش انك انتي تقومي بتنظيف اذنك بنفسك عارفه ليه ؟

اضرار تنظيف شمع الاذن

  التنضيف بيحصل في اذنك كل يوم  وبشكل طبيعي ، انك تتدخلي وتقومي بتنضيفها بنفسك بإيدك او بأعواد القطن ده هيسبب في انسدد في الاذن لانك حركتي الشمع  لدرجه اعمق من مكانه وممكن لقدر الله يسبب في ثقب في الاذن.

اضرار زيادة او نقص شمع الاذن

زيادة شمع الاذن ممكن يسببلك انسداد في الاذن ودي اسباب انسداد الاذن :

• الغدد الدهنية والعرقية اللي اتكلمنا عنها في انها بتكون سبب في تكوين الشمع لو حصلها إفراز زياده هتفرز شمع زياده وهتكون نتيجته انسداد في الاذن وده بيحصل بسبب ان جسم غريب يدخل الاذن او لو في إلتهابات او عوامل وراثية تانية .
•  كتير منا لو بينزل حمام السباحة او حتي بمجرد دخول مياه في الاذن يحصله انسداد... دخول المياه في الاذن بيسبب في زياده في افراز الشمع وبكده ممكن تتعرضي لانسداد في الاذن .
•  حالات معينه بيرجع الإنسداد بسبب ان قناة الأذن الداخلية بيكون حجمها مش كبير كفاية بالنسبة للافرازات وبكده بيزيد كمية الشمع وبيحصل انسداد .
  

اعراض انسداد الاذن

•  هتحسي بانك مش بتسمعي كويس (ضعف في السمع ) .
• هتحسي بان اذنك مليانه شمع بنسبة كبيره.
•  هتحسي بوجع في اذنك وكمان بشكل كبير بحكه وعدم راحه.

 وفي حالة انك اتعرضتي لانسداد في الاذن ماتحوليش تحلي المشكلة بنفسك ولازم تتابعي مع الدكتور الخاص بيكي لان الاهمال او العلاج الغلط ممكن يسبب في مضاعفات زي لقدر الله التهاب الاذن الوسطي , او فقدان السمع .

 هل شمع الاذن يسبب صداع

 إصابتك بإلتهاب بالأذن الوسطي ممكن يسبب صداع ،غالبا بيكون بسبب رشح وانسداد في الأنف اللي بدوره بيسد قناة استاكيوس وده بدوره بيسبب إلتهاب في الأذن الوسطى وعشان تعالجي المشكلة دي عليكي تعملي ايه ؟! :

• هتستخدمي اوتريفين  3 مرات يومياً عشان تعالجي الرشح والانسداد في الانف .
• حبوب كلاريناز للرشح مرتين يوميا مع مضد حياوي زي كيورام  1 جرام  كل 12 ساعه .
• نقط اوتوكالم للاذن 3 مرات يومياً .

ومش شرط يكون الصداع بسبب وجع في الاذن ممكن يكون بسبب تاني ، ضعف نظر ، انسداد في الجيوب الأنفية ، او مشكله في الاعصاب .

طرق تنظيف شمع الاذن

قطرات تنظيف الاذن من الشمع

مثل كاربامايد بيراوكسايد (Carbamide Peroxide ) أو نافازولين هايدروكلورايد( Naphazoline Hydrochloride )

هتتخلص من كل الشمع الزياده في الاذن وهي عباره عن قطرات اول لما تقطري بيها اذنك هتستني عليها لمده من 2-3 دقائق عشان تسمحي للقطرات انها توصل لشمع الأذن تواظبي عليها من 2-3 مرات يومياً ولمدة من 3-7 ايام وبعد كده هتحسي بتحسن و ان رقائق وقشور شمع االأذن  بيسقط واحده واحده.

غسيل الاذن وتنظيفها من الشمع

  احب اطمنك انها مش هتسببلك وجع  ومش هنلجأ لغسل الأذن الا لو قطرات الأذن معملتش نتيجة ، هتابعي مع الدكتور الخاص بيكي وهيقوم بعملية تنظيف الأذن عن طريق مياه فاتره بآله شبهه النافورة وبضغط بطريقه مناسبه ومن خلالها يبدأ الشمع انه يخف.

تقدري تقومي بعملية التنظيف بنفسك بس لازم تكوني حذره جدا :

 تقدري تتخلصي من الشمع االزياده بس بمساعده حد من بيتك فانه اللي يقوم بالعملية دي هيستخدم فيها ملقاط مش حاد ويخرج الشمع الزياده بس براحه خالص وبلطف و بتسليط إضاءة قوية علي الاذن .

تنظيف شمع الاذن للاطفال

طبعا لو عندك طفل بتكوني بتسألي ازاي تتخلصي من الشمع الزياده في أذنه من غير ما تإذيه احنا هنقولك تعملي ايه بظبط :

• ابعدي بعد نهائي عن اعواد القطن او صباعك في التنضيف لان ده ممكن يسبب في انك تدخلي الشمع لجوا الاذن وتسببي لطفلك انسداد ، في حالة لو طفلك محتاج تنظيف للاذن قطرات التنظيف هي الحل .
• ممكن تسلطي ضوء علي اذن طفلك عشان تتطمني ان مفيش اي اجسام غريبه ممكن تسبب فإنها تتضر سمعه .
• لازم تقومي بتنضيف حوالين الاذن بطريقه يوميه وطبعا باهتمام ، الزوايا من جوا ومن برا ومن ورا الاذن وطبعا براحه خالص وبلطف .
• الاطفال بيكونوا متعرضين للالتهابات في الاذن  ومن علاماتها احمرار و تورم في الاذن ، وفي حالة زي كده لازم طبعا تتابعي مع دكتور ومش بيكون في اي قلق لان ده وارد ان ان يتصاب بي اطفال كتير .

في كل الاحوال اهم حاجه تتابعي دايما دكتورك الخاص اهتمامك بنفسك شيء أساسي وما تنسيش ( ان لنفسك عليك حق ) ... ده حق جسمك عليكي انك تهتمي بي .