أفضل وسائل منع الحمل .. وماهو منع الحمل للرجال ؟

أجدادنا زمان كانوا بيقولوا "العيال عزوة"  "اللي ملهوش ولد ملهوش سند "، وكانوا بيخلفوا اطفال كتير سواء كانت طاقتهم او مادياتهم تسمح لده او لأ ؟!..

لكن مع الوقت كل حاجه بتتغير , ومع التطور الفكري اللي بيحصل احتياجات اطفالنا كبرت مبقتش مقتصرة علي تربية و تجهيز للجواز وبس  , وبدأت كل ست بيت تفكر وتحسبها قبل ما تقرر تجيب اي طفل للدنيا .

وبالتالي كل أب وأم بيبدأوا يشوفوا طاقتهم المادية , وبيقرروا من حسابتهم يقدروا علي تربية كام طفل وعشان ست البيت تحافظ علي قرراها بتلجأ لوسائل منع الحمل سواء كانت طبيعية او كيميائية او جراحية.

 ومن هنا هنقولك علي طرق مختلفه لمنع الحمل وهنبدأ بالطريقه الطبيعية ركزي معايا .

وسائل منع الحمل 

وسائل منع الحمل الطبيعية

 من غير اي أدوية او اي تدخل جراحي عشان تطمني لو انتي من الناس اللي بتخاف علي نفسها اوي او الأدوية بتسببلها مشاكل في الهرمونات .

منع الحمل بأعتماد التقويم ( ميعاد البويضه )

طريقه ناجحه جدا وعن تجربة لكتير من كل ست بيت كل اللي عليكي هو الآتي :

• تعرفي الدورة الشهرية منتظمة ولا لا لان عدم انتظامها ممكن يسبب في حمل لأنك بكده مش هتحسبي أيام التبويض صح وهقولك هتحتاجي تحسبي أيام التبويض ليه .
• لازم تحسبي أيام التبويض هتكون امتي بظبط لان في فترة التبويض بتكون البويضه جاهزة للأخصاب وبالتالي احتمال كبير يحصل حمل ، وممكن تتإكدي من أيام التبويض عن طريق درجة حرارة جسمك اللي هتكون في الوقت ده اعلي نص درجة او اعلي درجة عن الطبيعي وكمان بتكون الإفرازات المهبلية في الوقت ده اعلي من اي وقت تاني عشان كده لازم تتجنبي في االوقت ده الجماع لمنع الحمل طبيعي .

منع الحمل للمرضع

• وبتعتمد عليها سيدات بيوت كتير جدا وخصوصاً ان في فترة الرضاعة بيتوقف الجسم عن التبويض وبتنقطع الدورة الشهرية للأم وبالتالي مفيش اخصاب .
• لكن السؤال بتجيب نتيجة فعالة دايما ؟!  مش في كل الاوقات وخصوصاً انها طريقه فعالة في خلال اول 6 شهور من الرضاعة بس وان لازم الطفل اعتماده الكلي يكون علي لبن الأم ومن اول لما تبدأ ان الدورة الشهرية ترجع تاني بيكون احتمال الحمل وارد جدا. 

وسائل منع الحمل الكيميائيه

وده بيتم عن طريق إستخدام بعض الأدوية الخاصة بعدم حدوث حمل مع العلاقه الحميمية .

حبوب منع الحمل

(OC- Oral Contraceptives) هي حبوب تحتوي علي الاستروجين والبروجستيرون ودول نوعين من الهرمونات والتغير فيهم بيسبب في حدوث التبويض ، وتناولها يمنع الاباضة، وبكده تمنع الحمل. ولازم تاخدي الحبايه كل يوم بإنتظام وبكده يحصل منع للحمل بنسبه ممكن توصل ل99%.

حُقن منع الحمل

الحقنة دي بتحتوي علي مشتق من هرمون البروجسترون اللي اتفقنا انه بيكون سبب في حدوث البويضه والمميز في الحقنة ان بيدوم مفعولها لمدة 3 اشهر يعني مش هتحتاجي ليها إلا كل 3 شهور وهي طريقه ناجحه جدا ونسبة حدوث حمل فيها بتوصل لنسبة 1 %.

لصقات منع الحمل

لصقات بيكون فيها هرمون االبروجسيترون والاستروجين وممكن وضعها علي الذراع او الكتف او البطن وتقومي بإستبدالها كل اسبوع مفعولها بظبط زي مفعول حبوب منع الحمل .

وسائل منع الحمل الجراحية

وهنا لازم تعرفي نقطه مهمه جداا ، ان النوع ده بيسبب عقم مش منع مؤقت يعني لازم تفكري كويس جدا قبل ما تإخدي قرار كبير زي ده.

ربط قنوات فالوب لمنع الحمل

ربط قنوات فالوب (Tube Ligation) من الجانبين وبالتالي يمنع البويضات والحيوانات المنوية انها توصل للرحم والنوع ده من العمليات بيتم بتنظير البطن او في حالة الولادة بعد العملية القيصرية.

استئصال الأسهر , منع الحمل للرجال

النوع ده من العمليات بتجري لرجال وبتسبب عقم ، الاسهر او القناة المنوية هي قناة بتوصل الخصيه للقضيب وعن طريقها بتوصل الحيوانات المنويه من الخصيه للقضيب وقطعها بيكون كفيل لمنع الحمل ونتيجة العملية دي ممتازة وناجحه جدا .

ومن هنا نكون لخصنا طرق منع الحمل وعليكي انك تختاري الطريقة الانسب ليكي وطبعا كل ده لازم يكون تحت اشراف الدكتور الخاص بيكي .