روح اتخلقت جواكي وهتكوني أم !...خبر فيه مشاعر كتير متلغبطه فرح علي خوف علي توتر , دماغك بيجي فيها اسئله كتيرر وخصوصاً لو ده اول حمل ليكي .
ازاي في التسع شهور احافظ علي نفسي عشان الطفل يكون بصحه احسن ؟! نفسيتي هتأثر علي البيبي ولا لا ؟! كل شهر في الحمل هحس بإيه وازاي اكون مستعده وجاهزة نفسياً و جسديا ؟!
احنا هنصورلك التسع شهور كلها شهر بشهر هتحسي بإيه ومش بس كده هنقولك تستعدي كمان ازاي ، يلا بينا ...
جدول شهور الحمل ونصائح كل شهر
الحمل في الشهر الأول
الشهر الاول ممكن يعدي من غير ما تحسي بإعراض او تعب وممكن تحسي بتعب كبير جدا بتختلف منك لغيرك بس علي الاقل واحد من الاعراض دي هتمر عليكي وهتحسي بها .. والاعراض دي زي إيه ؟!.- الاحساس بالتعب المستمر.
- الانتفاخ .
- الشعور بالغثيان .
- ورم في الثديين.
- تقلب المزاج ( مع ان والله من غير الحمل مزاجنا بيتغير علطول 😁 )
- التبول اكثر من المعتاد .
نصائح الشهر الأول في الحمل
- تتجنبي التدخين وتقللي علي قد ما تقدري اي حاجه فيها كافيين
- ركزي علي انك تاكلي أكل مفيد لجسمك وغني بالفيتامينات والبروتينات والكالسيوم .
- وفي حالة التعب او الارهاق اللي هتحسي بي معظم الوقت ممكن تمارسي رياضة تكون مناسبة معاكي و لحملك .
الحمل في الشهر الثاني
وفي الشهر التاني الاعراض بتكون اقوي ، ممكن اعراض الشهر الاول تستمر معاكي بس بتحصل تغيرات زيادة زي إيه ؟- حرقه المعده والغثيان .
- الجسم بينتج دم اضافي ونتيجه لكده ضربات القلب تكون اسرع واصعب .
- ونيجي علي اكتر نقطه بتخاف منها كل بنت وهي زيادة الوزن من اول الشهر التاني بيكون في احتمال كبير يحصل زياده في الوزن.
- الامساك .
- ان يكون نفسك في إكلات معينه او زي ما بنقول الوحم واوقات بيكون العكس نفور من اي اكل او حتي من ريحته .
نصائح الشهر الثاني في الحمل
- حاولي تبعدي عن وجبات الاكل السريعة او اي اكل في دهون كتير عشان تتجنبي الزياده في الوزن وقسمي وجبات في اليوم علي وجبات صغيره طول يومك .
- طبعا لازم تستمري في انك تمارسي الرياضه وعلي اكلك انه يكون صحي زي ما اتفقنا في اول شهر .
الحمل في الشهر الثالث
من اكتر مراحل الحمل خطورة وحساسية كمان لان بيحصل في تغيرات جسدية ونفسية ، وفي الشهر ده بتحصلك اعراض خارجيه وهتكون ملحوظه زي ايه ؟!- بيتغير اللون حول الحلمات في الصدر للون اغمق ونقط بيضاء بارزه .
- نمو للرحم بشكل كبير ، عشان يستوعب التطور السريع للجنين .
- تضخم لغدد العرقية للأم .
نصائح الحمل في الشهر الثالث
- لازم تعملي فحوصات وتحاليل في الشهر ده عشان تعرفي كمية الحديد في الجسم وتتإكدي لو في مرض او مشاكل ممكن انها تنتقل لطفل في المستقبل .
- ابعدي عن جزم الكعب العالي وإلبسي احذية تكون مريحه ليكي في المشي .
الحمل في الشهر الرابع
من هنا بيبدأ الثلت التاني من الحمل الشهر الرابع والخامس والسادس والخبر الحلو ان بتبدأ اعراض الثلث الاول من الحمل انها تختفي ولكن بتظهر اعراض تاني زي إيه ؟!- ضيق في التنفس او انك تتنفسي بشكل سريع .
- زياده تدفق الدم ممكن تسببلك نزيف في اللثه او الانف .
- ممكن تحسي بدوخه او يحصلك حالة اغماء بسبب التغيرات في الدم والأوعية الدموية او بسبب انك تتحركي بسرعه وبطريقه مفاجأة .
- نفسك بتكون مفتوحه علي الاكل وبيقل عندك سدت النفس من الاكل او النفور منه .
- الاورده في الساقين بتكون واضحه وده راجع لزياده حجم الدم .
نصائح الحمل في الشهر الرابع
- كوباية لبن كل يوم عشان تقدري تسدي احتياج جسمك للكالسيوم وتاكلي خضار كتير و اكلات يكون عنصر الحديد عنصر اساسي فيها .
- ابعدي عن الحلويات او لو انتي بتحبيها اوي حولي تتجنبيها بشكل كبير واستبدلي السكر بالعسل في التحلية .
الحمل في الشهر الخامس
هنا يعتبر نص الطريق وفي العاده ممكن اعراض الحمل تقل ولو استمرت بتكون بنفس اعراض الشهر الرابع مع زياده حجم الثديين .نصائح الحمل في الشهر الخامس
- نبعد عن الاكل المالح ونحاول نقلله علي قد ما نقدر في الاكل ولو نقدر اننا نبدله بالليمون كمان يكون احسن لان عنصرالصوديوم الموجود في الملح ممكن يسبب لقدر الله في اجهاض .
- اشربي مياه كتير من 8 ل 10 كوبايات في اليوم وعصاير كمان و شوربة خضار وياريت لو تبعدي عن انك تحبسي المياه في جسمك لان ده خطر عليكي وعلي الجنين .
الحمل في الشهر السادس
هنا بتستمر نفس اعراض الشهر الرابع والخامس لكن في نقطه مهمه لازن تخلي بالك منها وهي ؟!- في نوع من الانقباضات اسمه انقباضات براكستون - هيكس وفي بعض الامهات بتحس بضغط بس مش مؤلم في البطن والرحم ودي انقباضات طبيعية متخافيش منها .
- لكن لو الضغط ده كان متكرر ومؤلم لازم تروحي لدكتور الخاص بيكي .
نصائح الحمل في الشهر السادس
- احساسك بالجوع هيكون زياده ولازم تسدي الجوع باكلات مفيده .
- لازم تعملي تحليل سكر عشان تتطمني انك غير مصابه بسكر الحمل ده بيكون مرض سكر بس مؤقت بيروح مع الولادة متقلقيش بس اهم حاجه تتإكدي انتي مصابه بي ولا لا عشان تحافظي علي الجنين .
الحمل في الشهر السابع
هنا بيبدأ الثلث الاخير من الحمل وانتي وطفلك بتبدأوا انكوا تستعدوا للولاده وبيحصل اعراض للشهر ده بس المره دي اكتر اعراض كل ام بتحبها تعالي نشوف .- حركه الطفل بتكون منتظمه وبتلاحظيها و بيتفاعل مع اي صوت و بيتإثر باي حاجه ممكن تحصل حواليكي وفي حالة انه يقف عن الحركة لازم في اللحظه دي تستشيري الدكتور فوراً .
- في اخر الشهر السابع يبدا الطفل انه يستعد للولادة عن طريق ان وضعه في الرحم بيتغير بمعني ان رأسه تكون للاسفل .
نصائح الحمل في الشهر السابع
- اتعرضي للشمس في فتره قبل الضهر عشان تحصلي علي فيتامين د او ممكن تستفادي من فيتامين د لو اكلتي سمك زي السلمون او غيره .
- ابعدي عن اللبس الضيق او الكعب العالي في الشهر ده خصوصاً لانه هيسببلك ارهاق وتعب اكتر.
الحمل في الشهر الثامن
هنبدأ العد التنازلي للولاده وهنا الاعراض هتكون مختلفه خالص تعالي نشوف ...- انتفاخ في العيون والجفون نتيجة زيادة الدوران الدموي .
- ضيق في التنفس نتيجة ارتفاع الحجاب الحاجز وزيادة حجم الجنين .
- جفاف الجلد والشعور بالحكه فيه وخصوصاً في منطقة البطن .
- عدم السيطرة في خروج البول نتيجة ضغط الرحم علي المثانه .
نصائح الحمل في الشهر الثامن
- حاولي انك تتجني الوقوف لفتره طويله وكمان اقعدي قاعده مريحه لجسمك ولضهرك وياريت كمان تكون رجلك مرفوعه عن الارض وانتي قاعده .
- المشي لمده نص ساعه كل يوم في وقت يكون الجو فيه مش حر ولطيف وطبعا مع انك تحافظي وانتي بتتمشي انك تشربي كمية مناسبة من المياه .
- اتجنبي التوتر والعصبية و اي ضغط نفسي في الوقت ده ولو تقدري انك تشتركي في فصول لليوغا ياريت .
الحمل في الشهر التاسع
جاهزة ان طفلك يجي علي الدنيا ؟ تعالي نعرف اعراض اخر شهر ايه ؟!- آلام في الظهر كبيره وخصوصاً في الاسفل.
- زيادة وزن البطن وتمدد عضلاته.
- تشنجات في االساق والآم في الحوض .
- تورم القدم والمعصم واليد بسبب احتباس السوائل في الجسم.
نصائح الحمل في الشهر التاسع
- ممارسة الوضعيات التي تسهل الولادة مثل وضعية الركوع وتمارين كيجل.
- اول لم يقرب ميعاد الولادة اشربي مشروبات واكلات تسهل عملية المخاض، زي القرفة واليانسون، التمر والعسل وغيرهم.
- المشي اليومي عشان يسهل عملية الولادة .
وفي الآخر انتي هنا مش مسؤلة عن روح واحده انتي مسؤله عن روحين اه في تعب بس بمجرد ما طفلك يخرج لدنيا وتشوفيه بعينك هتنسي كل التعب .
تعليقات
إرسال تعليق